Sunday, July 3, 2022

Toby Keith zbulon se është diagnostifikuar me kancer në stomak


Ylli i muzikës ‘country’, Toby Keith njoftoi se ai po luftonte me kancerin në stomak që nga vjeshta dhe i është nënshtruar trajtimit për gjashtë muajt e fundit.

“Vjeshtën e kaluar u diagnostikova me kancer në stomak. Unë i kam kaluar 6 muajt e fundit duke marrë kimioterapi, rrezatim dhe operacion. Deri këtu, shumë mirë. Më duhet kohë për të marrë frymë, për t’u rikuperuar dhe për t’u çlodhur”, u tha ai fansave në një deklaratë të postuar në Instagram dhe Twitter të dielën (12 qershor).

Keith, 60 vjeç, e përfundoi deklaratën e tij duke thënë se mezi pret të kalojë kohë me familjen e tij, por pranoi se “do t’i shihte fansat sa më shpejt”.

Foto: Getty

“Mezi pres”, ka shkruar ai.

Miqtë e famshëm të Keith, këngëtarët dhe fansat e muzikës country vërshuan komentet me lutje dhe urime.

Foto: Getty Images

Keith ka qenë në turne për albumin e tij të ri dhe është planifikuar të performojë në Illinois dhe Michigan më 17 dhe 18 qershor, megjithëse nuk janë bërë njoftime në lidhje me ndryshimet në orar apo anulimet.

Këngëtari i “I Love This Bar” themeloi fondacionin ‘Toby Keith’ në 2006 për të ofruar mbështetje për fëmijët që luftojnë kancerin.

Tetë vjet më vonë, fondacioni i tij hapi “një shtëpi pa kosto, të përshtatshme dhe të rehatshme për pacientët me kancer pediatrik që marrin trajtim”, sipas faqes së saj të internetit.

Foto: Getty Images

“Nuk ka dhuratë më të madhe se mbajtja e familjeve të forta dhe të bashkuara gjatë një kohe të vështirë. Nëse ne mund të lehtësojmë stresin në një familje, të inkurajojmë një vëlla apo motër dhe të ngushëllojmë një fëmijë të sëmurë, atëherë do të bëjmë një ndryshim në luftën kundër kancerit”, thuhet në faqen e internetit të fondacionit. /Telegrafi/

Lajmet e fundit