Sunday, June 26, 2022

Nga tapeti i kuq, mysafirët specialë e deri te koreografia e përgatitur nga ish-banorët – gjithçka që pritet të ndodhë në finalen e Big Brother VIP


Sonte (e premte) do të mbahet nata finale e spektaklit shumë të shikuar, Big Brother VIP.

Aventura e cila ka zgjatur më shumë se 136 ditë do të marrë fund me shpalljen e një fituesi, i cili do të fitojë çmimin e madh prej 115 mijë eurosh.

Pretendentët për të fituar këtë çmim janë finalistët që i rezistuan deri në fund kësaj gare: Donald Veshaj, Ilri Shaqiri, Einxhel Shkira dhe Beniada Nishani (Jakic).

Teksa fansat e shumtë të spektaklit presin me padurim shpalljen e fituesit, duket se një mal me befasi janë përgatitur për shikuesit.

Telegrafi ka mësuar nga burime pranë organizatorëve, disa nga përgatitjet që janë bërë për finalen e madhe.

Tapeti i kuq

Foto: Shutterstock.com

Duke qenë se ky Big Brother iu dedikua yjeve, produksioni ka vendosur që edhe mbrëmjen finale t’i trajtojë të gjithë banorët si yje.

Kështu, një nga risitë e mbrëmjes do të jetë tapeti i kuq, në të cilin do të defilojnë të gjithë pjesëmarrësit që kanë qenë pjesë e Big Brother VIP.

Sigurisht që ky tapet i kuq do të mirëpres me entuziazmin më të madh katër finalistët gjatë daljes së tyre.

Skenë e veçantë

Foto: Top Channel

Skenografia e natës finale gjithashtu ka ndryshuar dhe do të jetë speciale.

Këtë e bëri të ditur vet prezantuesja Arbana Osmani përmes një postimi në InstaStory, të cilin e fshiu vetëm pak pasi e publikoi.

Koreografi nga ish-banorët

Foto: Arbana Osmani/Paloma/InstaStory

Një koreografi e veçantë është gjithashtu ajo e cila do të prezantohet në hapje të finales së madhe.

Kjo performancë do të interpretohet nga ish-banorët që kanë qenë pjesë e formatit shumë të suksesshëm.

Ata kanë publikuar vazhdimisht gjatë këtyre ditëve imazhe nga provat që kanë zhvilluar për realizimin e kësaj koreografie

Befasi dhe mysafirë specialë për banorët

Duke qenë se i kanë rezistuar gjatë këtij rrugëtimi, për finalistët janë rezervuar befasi të shumta.

Pritet që të premten të futet në shtëpi ish-banorja, njëherësh këngëtarja Beatrix Ramosaj, për t’i bërë një surprizë të dashurit të saj, Donaldit.

Ata të dy kanë qenë shumë të përfolur gjatë këtyre ditëve, pasi u tha se Ramosaj ndodhej në Dubai duke humbur mundësinë e takimit në një prej netëve të spektaklit, gjersa është konfirmuar nga vëllai i saj Albani, se është kthyer në Tiranë për finalen e madhe.

Foto: Alban Skënderaj/InstaStory

Këngëtari Alban Skënderaj gjithashtu mendohet se do të jetë një nga artistët që do të ofrojë befasi për banorët finalistë.

Sipas burimeve, këngëtari i shumë hiteve do të jetë prezent në skenën gjigante të Big Brother VIP për të interpretuar një repertoar hitesh nga diskografia e tij muzikore. /Telegrafi/

Lajmet e fundit